Reynslubolta í launadeilu við RÚV sagt upp störfum

Félag fréttamanna, stéttarfélag stórs hlutfalls fréttamanna á Ríkisútvarpinu, telur það sæta furðu að yfirstjórn Ríkisútvarpsins láti niðurskurð hjá stofnuninni bitna á fréttastofunni. Þremur fréttamönnum var sagt upp í síðustu viku og hafa níu stöðugildi tapast með tilfæringum starfsmanna og lægra starfshlutfalli. Einn þeirra sem sagt var upp hefur starfað í aldarfjórðung á fréttastofunni og sagður eiga inni réttmæt laun.

Alma Ómarsdóttir, formaður Félags fréttamanna, segir í yfirlýsingu til fjölmiðla, sem sjá má í heild að neðan, að félagið gagnrýni niðurskurðinn sem fréttastofan standi frammi fyrir. Á sama tíma og neyðarástand ríki í samfélaginu og auknar kröfur séu um stöðugar og traustar fréttir skjóti skökku við að skorið sé niður á fréttastofunni.

„Það gefur auga leið að fækkun um níu stöðugildi rýrir gæði og vinnslu frétta. Þegar dregið er úr getu fjölmiðla til að stunda gagnrýna blaðamennsku er hætta á að aðgengi almennings að nákvæmum og greinargóðum upplýsingum skerðist. Þetta er sérstaklega hættulegt á tímum upplýsingaóreiðu.“

Í baráttu fyrir réttmætum kjörum

Uppsagnir þriggja fréttamanna hafa þegar tekið gildi en fram hefur komið í fjölmiðlum að Jóhann Hlíðar Harðarson, reynslumikill fréttamaður á RÚV og áður Stöð 2, hefur verið sagt upp en hann var í ársleyfi frá störfum. Þá var fækkað um einn í starfsteymi fréttastofunnar á Akureyri og missti Úlla Árdal starfið sitt. Þá var Pálma Jónassyni sagt upp en hann hefur starfað á fréttastofunni í rúmlega aldarfjórðung.

„Sá hefur átt í viðræðum við yfirstjórn RÚV vegna vangoldinna yfirvinnugreiðslna, sem hann sannarlega hefur átt rétt á. Félagið setur spurningamerki við að starfsmaður sem barist hefur fyrir réttmætum kjörum sínum fái uppsagnarbréf áður en það mál er til lykta leitt,“ segir Alma í yfirlýsingunni. Aðspurð segir Alma um tíu fréttamenn í félaginu eiga í samskonar ágreiningi við yfirstjórn RÚV um vangoldin laun.

Félagið harmi uppsagnir þessara vönduðu fréttamanna og skorar á yfirstjórn RÚV að endurskoða boðaðan niðurskurð á fréttastofunni og skorar á stjórnvöld að sjá til þess að geta RÚV til að sinna almannavarnahlutverki sínu verði ekki skert.

Fréttastofa sendi Stefáni Eiríkssyni fyrirspurn í síðustu viku varðandi breytingarnar hjá RÚV vegna niðurskurðarins. Hann sagði fleiri hagræðingaraðgerðir að baki og í gangi.

„Ástæðan er sú að við stöndum frammi fyrir miklu tekjufalli, bæði vegna þess að tekjur vegna auglýsinga hafa dregist saman auk þess sem tekjuáætlun fjárlaga gerir ráð fyrir lakari innheimtu á útvarpsgjaldi á næsta ári sem nemur mörg hundruð milljónum króna. Af þessum ástæðum hefur verið gripið til margvíslegra hagræðingaraðgerða hjá RÚV undanfarnar vikur og mánuði á öllum sviðum, bæði með breytingum og tilfærslu á starfsfólki, með samdrætti og hagræðingu í stoðdeildum, fækkun í yfirstjórn, niðurlagningu og sameiningu sviða, lækkun á starfshlutfalli, með því að ráða ekki í stöður sem losna og uppsögnum starfsfólks,“ segir Stefán.

Fréttastofa fylgdi fyrirspurninn eftir og spurt hve margir hafi misst vinnuna, verið lækkaðir í starfshlutfalli, fluttir á milli deilda eða ekki fengið endurráðningu. Fram kom að um tíu beinar uppsagnir hafi verið hjá RÚV undanfarna fimm mánuði. 

„Til að byrja með var fyrst og fremst horft til stjórnenda og stoðþjónustu í þeirri hagræðingu en óhjákvæmilegt reyndist á síðari stigum að grípa einnig til uppsagna hjá fréttastofu og í dagskrárgerð. Þessum aðgerðum til viðbótar hefur starfshlutfall verið lækkað hjá amk. fimm manns um 30-50% á sama tímabili. Jafnframt hafa fimm starfsmenn óskað eftir því að lækka starfshlutfall sitt um helming, en fólk sem farið er að nálgast eftirlaunaaldur hefur frá því í vor staðið til boða samningur um lækkun starfshlutfall gegn því að halda fullum launum fyrstu þrjá mánuðina. Auk alls framangreinds hefur verið gripið til annarra hagræðingaraðgerða eins og t.d. að ráða ekki í stöður sem hafa losnað bæði varanlega og tímabundið, endurnýja ekki tímabundna samninga, með tilfærslu fólks milli sviða, samdrætti í aðkeyptri þjónustu, endurskoðun og uppsögn ýmissa samninga (t.d. á sviði hugbúnaðarmála) og margt fleira mætti nefna.“