Eftirför í Mosfellsbæ

Lögregluþjónar veittu manni eftirför þegar hann sinnti ekki stöðvunarmerkjum lögreglu á Vesturlandsvegi í tíunda tímanum í gærkvöldi. Þó nokkur viðbúnaður var vegna eftirfararinnar og segir í dagbók lögreglu að maðurinn hafi verið eltur í gegnum Mosfellsbæ en hann hafi stöðvað við N1 við Vesturlandsveg. Samkvæmt heimildum fréttastofu var naglamottu beitt til að stöðva för mannsins.

Hann gistir nú fangageymslu vegna rannsóknar málsins.

Lögreglunni barst í gærkvöldi tilkynning um líkamsárás í Kópavogi. Tveir voru handteknir á vettvangi. Annar þeirra fyrir líkamsárásina og hinn fyrir vörslu fíkniefna. Einn var fluttur á slysadeild. Önnur líkamsárás varð ímiðbænum í nótt. Einn var handtekinn og vistaður í fangaklefa

Í dagbók lögreglu segir að á sjötta tímanum í gær hafi borist tilkynning um einstakling sem var sofandi ölvunarsvefni í bakgarði húss. Honum var vísað á brott. Þá var einn handtekinn í Hlíðunum fyrir að brjóta rúðu í heimahúsi.

Þá bárust þrjár tilkynningar um innbrot í fyrirtæki í gærkvöldi og í nótt.

Lögreglunni bárust einnig nokkrar tilkynningar um umferðarslys í gærkvöldi og í nótt. Í minnst tveimur tilvikum voru bílar óökufærir vegna slysa en ekki er vitað til þess að einhver hafi slasast alvarlega.