„Ég var algjör apaköttur“

„Ég sem alla textana sjálfur sem ég flyt en þetta er allt bara sannleikur, ég er bara að segja hvernig mér líður og ég kafa djúpt“ ,segir Hafþór Orri Harðarsson eða Blaffi, sem gefur út sína fyrstu plötu, Partý lestin, á morgun.

Blaffi er 23 ára Njarðvíkingur sem er búinn að vera að „leika sér“ í tónlistarsenunni síðan hann var 13 ára gamall. 

„Ég var fyrstu árin svona prakkara-rappari en svo fór ég að taka þessu alvarlega, núna vil ég fara að fá borgað fyrir þetta“, segir Blaffi og hlær.

„Ég byrjaði að vinna með alvöru liði í þessari senu og núna er allt orðið miklu meira pró. Ég hef líka verið svo heppinn að fá mjög góð ráð frá reyndu fólki í bransanum sem hefur hjálpað mér mikið.“

Að plötunni koma fjórir pródúserar, fjórir rapparar og tveir söngvarar auk Blaffa og segist hann mjög ánægður með útkomuna.

„Upphaflega ætlaði ég bara að gefa út smáskífu með fjórum til fimm lögum en svo þróðist þetta út í tólf laga plötu með þessu frábæra fólki. Ég er mjög spenntur fyrir þessu öllu, ég er eiginlega með hálfgert víðáttubrjálæði því að mér finnst allt vera að springa út núna, ég er að springa út.“

Aðspurður út í nafnið Blaffi segir hann það nafn hafa fests við sig á ákveðnu tímabili í sínu lífi.

Ég var í svo miklu rugli. Ég var eiginlega algjör apaköttur og þegar ég fór á djammið þá endaði ég oftast í black-outi. Þá festist þetta nafn við mig, Haffi í Blackouti – Blaffi!

Fyrir fimm árum síðan fór Haffi í meðferð og segist hann þá algjörlega hafa snúið við blaðinu og byrjað að einbeita sér meira að tónlistinni. Plata Blaffa ber nafnið Partý lestin og segir hann nafnið vera einkennandi fyrir lífsstílinn sinn áður en hann varð edrú.

„Eftir að ég varð edrú þá fór ég taka lífinu meira alvarlega og byrjaði meira að einbeita mér að tónlistarferlinum mínum. Svo á morgun er ég að halda útgáfutónleika fyrir fyrstu plötuna mína svo núna ræsi ég alvöru Partý lestina.“

Samdi lag um æskuvin sinn sem er fallinn frá 

„Lagið Hey vinur, er mér mjög kært en ég samdi það um æskuvin minn sem er fallinn frá. Þegar ég var að taka lagið upp þá brotnaði ég niður því mér fannst mjög erfitt að flytja það. Eins er lagið Geimfari mér mjög kært. En þessi tvö lög eiga það sameiginlegt að standa mér mjög nærri.“

Útgáfutónleikar plötunnar verða haldnir á Spot í Kópavogi annað kvöld frá átta til ellefu og mun Vísir vera með beina útsendingu frá tónleikunum.

„Það er samt pláss fyrir 100 gesti en það verða allir gestir að vera með grímur og vera vel sótthreinsaðir, við verðum að passa upp á okkur,“ segir Blaffi en auk hans koma fram RuddagadduR, Haukur H og Alexander Jarl.

https://open.spotify.com/album/40lhNZivuvXK0EzrkJdcdv