Ellefu ára vinkonur í símasambandi á hestbaki

Ellefu ára vinkonur í Biskupstungum deyja ekki ráðalausar á tímum kórónaveirunnar þegar þær eru ekki að hittast og leika saman því þær fara í staðinn á hestbak og eru í símasambandi við hvor aðra þegar daglegur útreiðartúr er tekin. Sjö kílómetrar er á milli þeirra.

 

„Hæ, hæ, viltu koma í reiðtúr?“ „Já, ókey, þá heyrumst við bara“.

 

Svona byrjar það þegar vinkonurnar Metta og Hildur fara í reiðtúr saman. Metta býr í Reykholti í Biskupstungum í Bláskógabyggð og Hildur í sömu sveit, á bænum Brekku. Sjö kílómetrar er á milli þeirra. Þær eru miklar hestastelpur og hafa alltaf riðið mikið út saman en nú eru þær ekki að hittast vegna Covid-19 og taka því símatæknina í sínar hendur. Metta er á Ísaþór, 16 vetra.

 

En hvað eru þær að tala um?

„Bara það sem okkur dettur í hug“, segir Metta.

 

Hildur, sem býr á Brekku ríður út á Sóley, 14 vetra sem er hennar hestur.

 

„Hæ, hæ, ég er að fara að leggja af stað. Ég heyri bara í þér á eftir“, segir Hildur þegar hún hringir í Mette.

 

 

Hildur og Sóley hita sig upp í reiðhöllinni, sem er verið að byggja heima hjá henni og svo fara þær út í snjóinn og veturinn og þá byrja þær Metta spjalla saman á baki.

 

Báðar hafa þær áhyggjur af því hvort landsmót hestamanna verður haldið á Hellu í sumar eða ekki vegna Covid-19.

 

„Já, við vorum mjög spenntar fyrir því en erum dálítið hræddar um að því verði frestað, en vonum bara það besta“, segir Hildur.