Grótta kom til baka fyrir norðan

Grótta gerði góða ferð norður á Akureyri og vann 1-2 sigur á Þór í riðli 3 í A-deild Lengjubikars karla í kvöld.

Grótta er með þrjú stig í riðlinum, líkt og HK sem vann FH í gær, 1-0.

Izaro Abella Sanchez kom Þór í 1-0 á 30. mínútu og þannig var staðan í hálfleik.

Á 62. mínútu jafnaði Kristófer Orri Pétursson fyrir Gróttu. Tólf mínútum síðar skoraði Pétur Theodór Árnason, markahæsti leikmaður Inkasso-deildarinnar í fyrra, sigurmark Seltirninga.

Grótta býr sig nú undir fyrsta tímabil sitt í efstu deild. Þór leikur hins vegar í 1. deildinni sjötta árið í röð.

Upplýsingar um úrslit og markaskorara eru fengnar frá úrslit.net.