Þyrla Landhelgisgæslunnar kölluð út í sjúkraflug á Vestfirði

Á þriðja tímanum í dag var áhöfn þyrlu Landhelgisgæslunnar kölluð út til þess að fara í sjúkraflug vestur á Flateyri og Ísafjörð.

Að því er fram kemur í tilkynningu frá Gæslunni verða allt að þrír sóttir til Flateyrar og komið undir læknishendur á Ísafirði en vegna ófærðar síðustu dag hafa þeir ekki komist frá bænum.

Þá veður einnig einn sóttur til Ísafjarðar og fluttur á sjúkrahús í Reykjavík. Þyrlan flytur jafnframt búnað fyrir björgunarsveitir og almannavarnir á Flateyri.

Faðir stúlkunnar sem lenti í snjóflóðinu á Flateyri er einnig um borð í þyrlunni en honum var boðið að fljúga með vestur á Ísafjörð til að geta hitt dóttur sína.

TF-GRO tók á loft frá Reykjavíkurflugvelli klukkan þrjú í dag og er gert ráð fyrir að þyrlan verði komin á Flateyri á fimmta tímanum.