Bikar­meistararnir krækja í Ingvar Jóns­son og Atla Barkar­son

Bikarmeistarar Víkings hafa heldur betur styrkt sig en í dag var tilkynnt um komu Ingvars Jónssonar og Atla Barkarsonar.

Samningurinn við þá er til þriggja ára.

Knattspyrnudeild Víkings hefur samið við Ingvar Jónsson og Atla Barkarson um að leika með félaginu næstu þrjú árin.

Velkomnir í Víkina!

— Víkingur FC (@vikingurfc) January 18, 2020

Ingvar Jónsson er þrítugur markvörður sem hefur leikið í Noregi og Danmörku síðan hann varð Íslandsmeistari með Stjörnunni árið 2014.

Hann hefur verið á mála hjá Start, Sandens Ulf og Sandefjord í Noregi en flutti sig svo yfir til Danmerkur sumarið 2018.

Þar spilaði hann með Viborg í dönsku B-deildinni en samningur hans við félagið rann út um mánaðamótin. Hann á að baki átta A-landsleiki.

Þórður Ingason var í marki hjá bikarmeisturunum Víkings á síðustu leiktíð.

Atli er átján ára bakvörður sem hefur verið undanfarin ár í unglinga- og varaliðum Norwich. Nú síðast var hann í norsku C-deildinni hjá Fredrikstad.

Þar fékk hann ekki áframhaldandi samning en Atli er uppalinn á Húsavík. Hann á leiki með öllum yngri landsliðum Íslands.