Hvorki Guðni né Guðmundur halda kosningavöku

Hvorki Guðmundur Franklín Jónsson né Guðni Th. Jóhannesson, frambjóðendur í forsetakosningnum, munu halda opinberar kosningavökur að kvöldi kjördags, næstkomandi laugardagskvöld, líkt og venja er.

Samkvæmt upplýsingum frá teymi Guðna mun forsetinn ekki halda neina kosningavöku og mbl.is greinir frá því að Guðmundur Franklín muni heldur ekki halda neinn opinberan viðburð að kvöldi kjördags.

Undanfarna ár og áratugi hafa frambjóðendur og framboð haldið kosningavökur í tilefni kosninga þar sem ýmist er hægt að fagna sigrum eða gráta tap í faðmi stuðningsmanna.

 Það yrði hins vegar erfiðara í ár því samkomutakmarkanir vegna kórónuveirunnar heimila ekki opnun skemmtistaða fram yfir klukkan 23, og gildir þetta líka um sali sem leigðir eru út í einkasamkvæmi.

Kjörstaðir loka klukkan tíu að kvöldi og því ljóst að frambjóðendum gæfist ekki mikill tími til að fagna nýjustu tölum með stuðningsmönnum sínum á sérstakri kosningavöku næstkomandi laugardagskvöld.