Minigarðurinn opnar um mánaðamótin: „Afþreying innandyra þarf að vera til“

Það er húrrandi niðursveifla og fjölskyldur sem og fyrirtæki halda flest að sér höndum. Ekki þó allir en í þessu árferði sér athafnamaðurinn Sigmar Vilhjálmsson tækifærin. Simmi Vill, eins og hann er alltaf kallaður, ætlar að búa til 80 ný störf í skemmtigarði í anda þeirra sem við sjáum bara í útlöndum.

Sindri Sindrason kynnti sér Minigarðinn í Skútuvoginum sem er minigolfstaður þar sem hægt verður að fara út að borða og fá sér nokkra bjóra. Fyrir rúmlega mánuði síðan var í raun allt á hvolfi í rýminu en mikið vatn runnið til sjávar síðan þá.

„Þetta er gömul hugmynd og gamall draumur má segja sem fékk byr undir báða vængi í fyrra þegar ég sá eiginlega alveg eins garð í London,“ segir Sigmar en staðurinn verður opnaður eftir aðeins nokkra daga.

„Þetta var hugmynd sem ég varð með fyrir Skemmtigarðinn í Smáralind. Svo fer það á ís en svo sé ég þetta í London og verð eiginlega að gera þetta eftir það. Kveikjan af þessu er aðallega að við búum á Íslandi og hér er allra veðra von og afþreying innandyra er eitthvað sem ég held að þurfi að vera til staðar.“

Í Minigarðinum er tveir níu holu golfvellir.

„Þeir eru svona aðeins stærri heldur en venjulegt minigolf sem við þekkjum hér á Íslandi. Þú spilar í rauninni bara einn völl og það tekur þig svona 45 mínútur að fara hringinn.“

Hér að neðan má sjá innslagið í heild sinni.