Líkir Guðmundi Franklín við Trump og segist ekki ætla að kjósa hann

Helgi Hrafn Gunnarsson þingmaður Pírata líkir Guðmundi Franklín Jónssyni forsetaframbjóðanda við Donald Trump Bandaríkjaforseta í pistli sem sá fyrrnefndi birti á Facebook-síðu sinni í gærkvöldi. Þá segir Helgi að forsetatíð Guðmunds Franklíns myndi einkennast af „dómgreindar- og ábyrgðarleysi, fljótfærni, ofureinföldunum og skeytingarleysi gagnvart staðreyndum.“

Helgi byrjar pistil sinn á því að segjast ekki hafa kosið Guðna Th. Jóhannesson forseta Íslands í síðustu forsetakosningum árið 2016. Hann muni hins vegar gera það núna þar sem hinn kosturinn, þ.e. Guðmundur Franklín, sé „svo arfaslakur að það er ekki verjandi að kjósa ekki gegn honum.“

Helgi rökstyður þessa skoðun sína með því að segja Guðmund Franklín hafa sýnt bæði „getu- og metnaðarleysi“ í því að draga rökréttar ályktanir út frá „aðgengilegum upplýsingum og rökfræði“.

„Hann virðist einfaldlega taka því fyrsta sem honum dettur í hug sem augljósum sannleika ef það passar við heimsmyndina hans. Heimsmynd hans virðist síðan hafa verið mótuð með sömu aðferð, og hefur því sömu galla og flestar ályktanir hans um stjórnmál: að vera með afbrigðum óáreiðanleg,“ skrifar Helgi. Það þýði þó ekki að Guðmundur Franklín hafi alltaf rangt fyrir sér eða að allt sem hann segi sé rangt.

Trump „vitleysingur og hrotti“

Þá þykir Helga pólitískur stíll Guðmundar Franklíns minna „óneitanlega“ á stíl Donalds Trumps, Bandaríkjaforseta.

„…[…] sem kemur ekki á óvart miðað við að Guðmundur Franklín hefur opinberlega lýst yfir stuðningi við þann dæmalausa vitleysing og hrotta. Það er eins og að þessi týpa líti svo á að sannleikurinn sé eitthvað svo óaðgengilegt og órannsakanlegt, að skoðanir fólks séu í rauninni alveg jafn gildar og staðreyndir.“

Helgi segir það loks augljóst að Guðmundur Franklín kæmi til með að fara mjög illa með forsetavaldið.

„Allt bendir til þess að hann myndi nýta málskotsréttinn fyrst og fremst í takt við eigin geðþótta en ekki vilja kjósenda, sbr. margra mánaða löngum undirskriftasöfnunum gegn þriðja orkupakkanum, sem aldrei komust nálægt 10%-markinu, og sem Guðmundur Franklín hefur margsinnis opinberað algjört skilningsleysi sitt á,“ skrifar Helgi.

Ljóst sé að forsetatíð Guðmundar Franklíns myndi einkennast af „dómgreindar- og ábyrgðarleysi, fljótfærni, ofureinföldunum og skeytingarleysi gagnvart staðreyndum.“ Pistil Helga má sjá í heild hér að neðan.

Guðmundur Franklín hefur í gegnum tíðina lýst yfir ánægju með Trump. Líkt og Vísir tók saman í byrjun vikunnar sagði Guðmundur Franklín í viðtali við Útvarp Sögu fyrir tæpum tveimur árum að þær konur sem halda því fram að þær hafi átt í kynferðislegu sambandi við Trump væru „dræsur“ sem demókratar hefðu dregið fram.

„Hverjum dettur í hug að klassagaur eins og Donald Trump sé að fara að taka svona dömur?“ spurði Guðmundur Franklín í viðtalinu.

Samkvæmt skoðanakönnunum sem framkvæmdar hafa verið í aðdraganda forsetakosninganna þann 27. júní næstkomandi hefur Guðni yfirburðarfylgi. Sá síðarnefndi fengi 92,4 prósent atkvæða en Guðmundur Franklín 7,6 prósent, samkvæmt könnun Maskínu og Stöðvar 2 sem gerð var fyrr í mánuðinum.