„Ekkasog og grátur örvinglaðra barna“

Kári Stefánsson, forstjóri Íslenskrar erfðagreiningar, er maður ekki einhamur. Hann hefur nú birt frumsamið ljóð á Facebooksíðu sinni þar sem hann yrkir um flóttafólk og brottrekstur barna frá Íslandi.

Kári hefur verið mjög í fréttum að undanförnu vegna tilboðs sem hann setti fram um skimun vegna kórónuveirunnar, tilboð sem hann dró svo til baka en endurskoðaði þá afstöðu sína; skimunin mun fara fram.

Meðan starfsmenn hans hjá Íslenskri erfðagreiningu undirbúa það viðamikla verkefni hefur hann hins vegar sest niður og tekið til við að yrkja. Hugur hans er hjá flóttafólki og birti hann nú fyrir stundu ljóð sem hefur fengið vængi og flýgur hratt um samfélagsmiðlana. Unnvörpum deilir fólk ljóði Kára sem hann kallar steinhjarta. Í athugasemdum talar fólk um átakanlegt ljóð. Með leyfi fundarstjóra:

Steinhjarta

Þegar ég hlusta á heiminn

er hjartað svo langt í burtu

og harmur barna sem ekkert eiga utan harminn

er alls staðar,

ekkasog

og grátur örvinglaðra barna

er framlag Íraks

til tónlistarmenningar heimsins

og hérna sitjum við

og blótum guði allsnægtar og óhófs

og hendum þeim út

á eyrunum

þessum börnum þegar þau biðja um hjálp.