Skjern úr leik í bikarnum

Bjerringbro-Silkeborg sló Skjern út úr dönsku bikarkeppninni í handbolta í kvöld.

Björgvin Páll Gústavsson stóð vaktina í marki Skjern allan leikinn. Hann skilaði ágætu dagsverki, var með rétt yfir 30 prósenta markvörslu.

Elvar Örn Jónsson náði sér ekki alveg á strik og skoraði aðeins eitt mark í 32-28 tapinu.

Fyrri hálfleikur var nokkuð jafn og var staðan 13-13 að honum loknum. Gestirnir í Skjern voru með undirtökin framan af í seinni hálfleik en þegar um tíu mínútur voru eftir tóku heimamenn völdin og sóttu sigurinn.

Bjerringbro-Silkeborg var síðasta liðið til þess að tryggja sér sæti í undanúrslitunum, fyrr höfðu Holstebro, GOG og Skanderborg tryggt sæti sitt þar.