Lærisveinar Patreks úr leik eftir vítakastkeppni

Lærisveinar Patreks Jóhannessonar eru úr leik í EHF bikarnum í handbolta eftir tap í vítakeppni á heimavelli í dag gegn austurríska liðinu Alpla Hard.

Skjern vann fyrri leikinn í Austurríki 25-26 og hugsuðu sér væntanlega gott til glóðarinnar að klára verkefnið á heimavelli. Leikurinn var hins vegar í járnum frá upphafi til enda, staðan í leikhléi 14-14.

Það stefndi allt í að Skjern væri að falla úr keppni þegar Ivan Horvat kom Alpla í 24-26 þegar níu sekúndur lifðu leiks en Rene Toft Rasmussen náði að minnka muninn í 25-26 á síðustu sekúndu leiksins og þurfti því vítakeppni til að gera út um einvígið. 

Töluverðan tíma tók að klára vítakeppnina þar sem dómarar leiksins voru ekki með allar reglur á hreinu. Eitthvað sem FH-ingar kannast vel við úr sömu keppni.

Eftir fimm umferðir af vítakeppni voru dómararnir ekki með á hreinu hvort sömu leikmenn og höfðu tekið víti í fyrstu fimm umferðunum mættu skjóta aftur. Ekki gat eftirlitsmaður EHF hjálpað þeim með það og þurfti því að gera hlé á vítakeppninni um stund.

Engu að síður fór að lokum svo að Austurríkismenn höfðu betur og verður Íslendingalið Skjern því ekki með í EHF bikarnum í vetur.

Elvar Örn Jónsson komst ekki á blað í leiknum en Björgvin Páll Gústavsson varði sex bolta.