Þetta gerist þegar mörg hundruð mentos blandast saman við nokkra lítra af kóki

Eins og margir vita passar mentos-nammið ekki vel saman við kók. Til eru mörg þúsund myndbönd á vefnum þar sem fólk setur eitt mentos úti í nýopnaða kókflösku og gosið sprautast upp úr flöskunni.

Fjallað hefur verið um málið á Vísindavefnum og þar segir: „Mentos er tiltölulega hrjúft og þungt. Það sekkur því til botns í gosflöskunni og ungar þar út loftbólum tiltölulega hratt. Sumir hafa bent á að hægt sé að ná fram sömu áhrifum með til dæmis matarsalti eða sandi. Matarsaltstilraunin hefur verið gerð og virkar vel, en ekki hefur neinn prófað sand svo vitað sé.

Og af hverju kók? Ekki virðist nein sérstök ástæða fyrir því að sú gostegund sé notuð umfram aðrar; allt gos hegðar sér eins að þessu leyti. Sumir segja að sykur hægi á loftbólumyndun og því sé betra að nota sykurlaust gos, en aðrir mæla með því að nota sódavatn.

Kók og mentos hafa samt á einhvern hátt náð að skapa sér sérstöðu í vitund fólks þó svo að hægt sé að skipta þeim báðum út fyrir eitthvað annað. Sennilega eru það hin óvæntu áhrif af samsetningunni sem gerir tilraunina svo áhugaverða og eftirminnilega.“

Á YouTube-síðunni Power Vision má sjá myndband sem hefur verið horft á yfir 17 milljón sinnum þegar þessi grein er skrifuð, en það kom inn á vefinn  29.september.

Þar má sjá mörg hundruð mentosmola í sama hylki og töluvert magn af kóki. Í myndbandinu má einnig sjá allskyns tilraunir með öðrum aðskotahlutum en mentos og kók tilraunin hefur vakið mest athygli.  Aðeins ein plastplata skilur að og þegar hún er tekin í burtu þá gerðist þetta.