Ekki hægt að reka Arnar frá Víkingi

Arnar Gunnlaugsson skrifaði í dag undir nýjan samning við Víking sem er afar sérstakur.

Samningurinn er til tveggja ára og er óuppsegjanlegur af beggja hálfu. Arnar verður því við stýrið í Víkinni næstu tvö árin sama hvað raular og tautar.

Það er augljóslega mikil ánægja með störf Arnars hjá félaginu sem tók við fyrir sumarið af Loga Ólafssyni. Hann hefur raðað í kringum sig ungum og efnilegum leikmönnum og leikstíll liðsins hefur hlotið mikið lof.

Arnar er búinn að koma Víkingi í bikarúrslit en Víkingur varð síðast bikarmeistari árið 1971. Bikarúrslitaleikur Víkings og FH er klukkan 17.00 á morgun og hefst upphitun á Stöð 2 Sport klukkan 16.30.