Hafdís á leið í markið hjá Fram

Kvennalið Fram í handknattleik mun fá mikinn liðsstyrk á næstu dögum er landsliðsmarkvörðurinn Hafdís Renötudóttir semur við félagið.

Stefán Arnarson, þjálfari Fram, staðfesti við Vísi að Hafdís væri búin að mæta á eina æfingu með félaginu og býst við því að hún skrifi svo undir samning á næstu dögum.

Hafdís er uppalin Framari en spilaði með Stjörnunni áður en hún fór til SönderjyskE sumarið 2017. Eftir eitt ár þar færði hún sig yfir til Boden í Svíþjóð. Hún var búin að semja við lið í Póllandi en hlutirnir gengu ekki upp þar og hún er því samninglaus og komin heim.

Markvörðurinn er 22 ára gamall og mun styrkja frábært lið Fram enn frekar en liðið vantaði helst styrkingu í markið. Nú er hún komin og ljóst að Fram-liðið verður illviðráðanlegt í vetur.