Fiskmarkaðurinn virðist hafa sloppið vel en altjón hjá hinum fyrirtækjunum

Starfsemi Fiskmarkaðs Suðurnesja er ekki í þeim hluta hússins að Fornubúð 3 í Hafnarfirði sem varð eldi að bráð í nótt, þó að ljóst þyki að einhverjar reyk- og hitaskemmdir hafi orðið þar. Skrifstofustjóri fyrirtækisins gerir hvorki ráð fyrir miklu tjóni né mikilli röskun á starfsemi fyrirtækisins vegna eldsvoðans í dag. Altjón varð í hinum hluta hússins, þar sem tvö matvinnslufyrirtæki eru til húsa.

Sjá einnig: Töldu í fyrstu að mögulega væri manneskja inni í húsinu

Þórður Kjartansson skrifstofustjóri Fiskmarkaðs Suðurnesja, eins fyrirtækjanna sem er með starfsemi í húsinu, sagði í samtali við Vísi í morgun að forsvarsmönnum fyrirtækisins hefði enn ekki verið hleypt inn á staðinn. Ragnar Hjörtur Kristjánsson, framkvæmdastjóri fyrirtækisins, væri þó á staðnum og verið væri að undirbúa að fara inn á vettvang ásamt fulltrúum tryggingarfélaga.

Þórður sagði að ekkert sé vitað um tjón hjá fyrirtækinu vegna brunans. Þó virtist sem eldurinn hafi ekki komið upp í þeim hluta hússins þar sem fyrirtækið er með starfsemi. Þá gerði Þórður ekki ráð fyrir mikilli röskun á starfsemi fyrirtækisins vegna eldsvoðans en starfstöðin í Hafnarfirði er ein af fimm stöðvum Fiskmarkaðsins á landinu.

„Allt handónýtt“

Tvö fyrirtæki eru hins vegar með starfsemi í hinum hluta hússins, þar sem hefur orðið altjón, að sögn Birgis Finnssonar varaslökkviliðsstjóra. Bæði fyrirtækin eru matvinnslufyrirtæki, annað nánar tiltekið í fiskvinnslu. „Þar er allt handónýtt,“ segir Birgir. Samkvæmt upplýsingum frá slökkviliðinu þykir þó ljóst að einhverjar reyk- og hitaskemmdir hafi orðið í þeim hluta hússins sem fór betur út úr eldsvoðanum.

Nú haldi áfram vinna við þann hluta hússins sem varð eldinum að bráð.

„Við erum með stórvirkan krabba sem rífur burtu þakplötur og efni sem hefur fallið niður og erum svo að sprauta á eld og glóðir sem eru þar undir,“ segir Birgir.

Fækkað hefur töluvert í mannskap slökkviliðsins sem kallaður var út í nótt. Þannig hefur næturvaktin verið send heim en hóparnir sem eftir eru hafa náð tökum á eldinum og munu halda slökkvistarfi áfram fram eftir degi.

Húsið að Fornubúð 3 er í eigu fyrirtækisins Haraldar Jónssonar hf. Haraldur Reynir Jónsson, eigandi fyrirtækisins, var á vettvangi í morgun en baðst undan viðtali við fréttastofu. Þá hefur enginn svarað þegar hringt er í símanúmer sem skráð er á fyrirtækið. Haraldur tjáði þó Mbl í morgun að tjónið á húsinu hlypi líklega á hundruð milljónum króna.