Vandræðagangur með myndir á Facebook, Instagram og WhatsApp

Fjölmargir notendur samfélagsmiðla hafa lent í vandræðum með að birta myndir á Facebook, skoða sögur á Instagram eða senda skilaboð á WhatsApp. Facebook segist vera meðvitað um vandamálið og unnið sé að lausn.

Vandamálið byrjaði um klukkan 13 að íslenskum tíma og virðist vera að leysast úr því ef marka má stöðu mála hjá DownDetector sem fylgist með gengi vefsíðna og smáforrita.

Svo virðist sem vandamálið nái til sumra mynda en ekki allra. Sumar birtast en aðrar ekki. Sama vandamál virðist vera við lýði í Facebook Messenger.