Ómar Ingi fór ekki með til Grikklands

Ómar Ingi Magnússon verður ekki með íslenska karlalandsliðinu í handbolta í leiknum gegn Grikklandi í Kozani í undankeppni EM 2020 á miðvikudaginn vegna höfuðmeiðsla. Íslenska liðið hélt af landi brott í morgun.

Ómar Ingi missti af síðustu leikjum Aalborg í úrslitakeppninni í Danmörku vegna meiðslanna. Aalborg varð danskur meistari eftir sigur á GOG, 38-32, í oddaleik í gær.

Grétar Ari Guðjónsson, markvörður Hauka, og Atli Ævar Ingólfsson, línumaður Selfoss, verða einnig utan hóps á miðvikudaginn.

Líkt og í síðasta leik Íslands, gegn Norður-Makedóníu í Skopje, verja Ágúst Elí Björgvinsson og Viktor Gísli Hallgrímsson mark íslenska liðsins gegn Grikklandi.

Vegna meiðsla Ómars Inga er Teitur Örn Einarsson eina örvhenta skyttan í íslenska hópnum.

Ísland er með fimm stig á toppi riðils 3 í undankeppninni en Grikkland er á botninum með tvö stig.

Síðasti leikur Íslands í undankeppninni er gegn Tyrklandi í Laugardalshöll á sunnudaginn.

Íslenski hópurinn sem mætir Grikklandi er þannig skipaður:

Markmenn:

Ágúst Elí Björgvinsson, IK Sävehof (27/0)

Viktor Gísli Hallgrímsson, Fram (4/0)

Vinstra horn:

Bjarki Már Elísson, Füchse Berlin (59/125)

Guðjón Valur Sigurðsson, Rhein-Neckar Lowen (354/1844)

Vinstri skytta:

Aron Pálmarsson, Barcelona (137/537)

Ólafur Guðmundsson, IFK Kristianstad (111/206)

Leikstjórnendur:

Haukur Þrastarson, Selfoss (8/9)

Elvar Örn Jónsson, Selfoss (22/68)

Janus Daði Smárason, Aalborg (33/39)

Hægri skytta:

Teitur Einarsson, IFK Kristianstad (14/10)

Hægra horn:

Arnór Þór Gunnarsson, Bergischer HC (103/296)

Sigvaldi Guðjónsson, Elverum (16/29)

Línumenn:

Arnar Freyr Arnarsson, IFK Kristianstad (44/65)

Ýmir Örn Gíslason, Valur (29/14)

Varnarmenn:

Daníel Þór Ingason, Haukar (28/9)

Ólafur Gústafsson, KIF Kolding (41/48)