Skelfilegt gengi Íslands á útivelli heldur áfram

Íslenska landsliðið í handbolta hefur undanfarin ár átt erfitt uppdráttar í leikjum útivelli og það hélt áfram í gærkvöldi.

Liðið gerði í gær jafntefli við Grikkland, 28-28, en íslenska liðið bjargaði jafntefli á ótrúlegan hátt með tveimur mörkum á síðustu tuttugu sekúndum leiksins.

Þegar rýnt er í tölfræði síðustu ára sést að tölfræði Íslands á útivelli er ekki góð. Liðið hefur einungis unnið tvo af síðustu þrettán leikjum sínum á útivelli; gegn Ísrael og Tyrklandi.

Gengi íslenska handboltalandsliðsins á útivelli er vægast sagt hrikalegt. Síðustu 13 leikir í undankeppni stórmóta hafa skilað tveimur sigrum, gegn Ísrael og Tyrklandi. #handkastidpic.twitter.com/fNT77ZNc7f

— Aron Gauti Laxdal (@aronlaxdal) June 12, 2019

Sex af þessum þrettán leikjum hafa tapast og fimm hafa endað með jafntefli en oftar en ekki er íslenska liðið að mæta liðum sem eru í neðri styrkleikaflokki.

Ísland mætir Tyrklandi í Laugardalshöllinni á sunnudag en með sigri þar tryggir liðið sér sæti á EM 2020.