Óðinn og félagar í úrslit eftir magnaðan endasprett

Óðinn Þór Ríkharðsson og félagar eru komnir í úrslit um danska meistaratitilinn í handbolta eftir ótrúlegan sigur á Skjern í oddaleik í undanúrslitunum í dag, 28-25.

Útlitið var ekki gott fyrir GOG sem var tveimur mörkum undir, 21-23, þegar rúmar sex mínútur voru eftir.

GOG átti hins vegar magnaðan endasprett, skoraði sjö af síðustu níu mörkum leiksins og vann þriggja marka sigur, 28-25, á meisturum síðasta tímabils.

Óðinn skoraði tvö mörk úr tveimur skotum fyrir GOG. Björgvin Páll Gústavsson varði eitt vítakast fyrir Skjern en Tandri Már Konráðsson var ekki á meðal markaskorara.

Í úrslitunum mætir GOG Janusi Daða Smárasyni, Ómari Inga Magnússyni og félögum í Aalborg.