Byggt við Íþróttahúsið á Hellu

Rangárþing ytra og verktakafyrirtækið Tré og Straumur í Skeiða- og Gnúpverjahreppi hafa undirritað verksamning vegna viðbyggingar, sem byggja á við Íþróttahúsið á Hellu.

Um er að ræða tvílyft hús úr límtré, klætt steinullareiningum með einhalla þaki við núverandi íþróttahús. Á neðri hæðinni verður áhaldageymsla en á þeirri efri verður líkamsræktaraðstaða sem tengist núverandi íþróttamiðstöð um göngusvalir í íþróttahúsi.

Verkáætlun gerir ráð fyrir að hafist verði handa í byrjun júní, að húsið verði fokhelt í haust og áhaldageymslan verði tilbúin til notkunar 15. desember 2019. Verklok eru áætluð þann 1. júní 2020. Verksamningurinn hljóðar upp á 123 milljónir króna. Samningurinn var undirritaður í Íþróttahúsinu á Hellu að viðstöddum fulltrúum sveitarstjórnar og Heilsu-, íþrótta- og tómstundanefndar sveitarfélagsins.

„Framkvæmdin mun bæta aðstöðu Íþróttamiðstöðvarinnar til mikilla muna og eykur enn á fjölbreytta nýtingarmöguleika íþróttahússins,“ segir Ágúst Sigurðsson, sveitarstjóri.