Gefur út bók um gjaldþrot WOW air  

Um næstkomandi mánaðamót kemur út bók um gjaldþrot flugfélagsins WOW air. Höfundur bókarinnar er Stefán Einar Stefánsson, fréttastjóri viðskipta á Morgunblaðinu, en í henni er farið yfir aðdragandann að stofnun flugfélagsins, uppgang þess og fall. Nýjar upplýsingar er að finna í bókinni, sem er gefin út af Forlaginu, er varða fall félagsins og eru þær sagðar varpa áður óþekktu ljósi á þær ítrekuðu tilraunir sem gerðar voru til að forða því frá gjaldþroti.

Vinna við bókina hófst fyrst þegar ljóst varð að félagið heyrði sögunni til í lok marsmánaðar og byggir hún á opinberum heimildum en einnig áður óbirtum skjölum. Þá hefur bókarhöfundar rætt við tugi einstaklinga sem tengst hafa WOW air með einum eða öðrum hætti í þau rúmlega sjö ár sem flugfélagið starfaði.

Vinnutitill bókarinnar, sem er ríflega 300 síður að lengd, er Með himinskautum, ris og fall flugfélagsins WOW air, en ekki liggur fyrir hver verður endanlegur titill bókarinnar. Höfundur leitaði eftir samstarfi við Skúla Mogensen, stofnanda og forstjóra flugfélagsins, um ritun bókarinnar en hann gaf ekki kost á því.