Arnór Þór markahæstur í spennusigri

Arnór Þór Gunnarsson átti frábæran leik í liði Bergischer sem vann Stuttgart í þýsku Bundesligunni í handbolta í dag. Rhein-Neckar Löwen valtaði yfir Bietigheim.

Arnór Þór skoraði átta af 29 mörkum Bergischer og var markahæstur í 29-28 sigri á Stuttgart.

Leikurinn var mjög spennandi og skoraði Max Darj sigurmark Bergischer á síðustu sekúndu leiksins en munurinn í leiknum hafði ekki verið meiri en eitt mark síðan í upphafi seinni hálfleiks í stöðunni 18-16.

Íslendingalið Rhein-Neckar Löwen vann stórsigur á Bietigheim 30-15. Ljónin gerðu það hins vegar án krafta Íslendinganna, Alexander Petersson er frá vegna meiðsla og Guðjón Valur Sigurðsson komst ekki á blað í leiknum.

Bjarki Már Elísson skoraði þrjú mörk fyrir Füchse Berlin sem vann Minden 28-27 á útivelli.