Svíar byrjuðu á sigri

Svíar byrjuðu undankeppni EM 2020 á sigri á Rúmeníu. Írland vann eins marks sigur á Gíbraltar.

Svíar skoruðu mark eftir hálftíma leik, Robin Quaison gerði það af stuttu færi úr teignum. Á 40. mínútu gerði Viktor Claesson annað mark fyrir heimamenn og fóru þeir með 2-0 forystu í hálfleik.

Claudiu Keseru náði að minnka muninn fyrir Rúmena á 58. mínútu en nær komust gestirnir ekki og Svíar fóru með 2-1 sigur.

Í sama riðli unnu tíu menn Möltu 2-1 sigur á Færeyjum. Færeyingar voru mikið meira með boltan og áttu fleiri tilraunir á markrammann en það kom þeim ekki að gagni í þetta skiptið.

Maltverjar áttu tvær tilraunir sem enduðu á rammanum og þær fóru báðar í netið. Fyrsta markið kom á 13. mínútu og gerði Kyrian Nwoko það eftir sendingu Paul Fenech.

Á 62. mínútu var Andrei Agius rekinn af velli með rautt spjald eftir að hafa handleikið boltann innan vítateigs. FH-ingurinn Brandur Olsen fór á vítapunktinn en spyrna hans var varin.

Færeyingar fengu svo dæmda á sig vítaspyrnu á 77. mínútu og Steve Borg skoraði úr spyrnunni.

Í uppbótartíma skoraði Jakup Thomsen mark fyrir Færeyinga en það kom of seint og Malta vann 2-1 sigur.

Mick McCarthy byrjaði sína aðra törn sem landsliðsþjálfari Íra með eins marks sigri á Gíbraltar.

Eina mark leiksins gerði Burnley maðurinn Jeff Hendrick eftir sendingu frá Conor Hourihane