Sádar sviptu son bin Laden ríkisborgararétti

Yfirvöld Sádi-Arabíu hafa svipt Hamza bin Ladaen, son Osama bin laden, ríkisborgararétti. Sú ákvörðun mun hafa verið tekin í nóvember en hún var fyrst tilkynnt í dag. Það var gert í kjölfar þess að Bandaríkin settu milljón dala til höfuðs Hamza sem talið er að haldi til á landamærum Afganistan og Pakistan. Utanríkisráðuneyti Bandaríkjanna kallaði Hamza háttsettan aðila innan al-Qaeda hryðjuverkasamtakanna.

Talið er að Hamza sé um það bil þrítugur en hann var við hlið föður síns í Afganistan á árum áður. Fyrir árásir hryðjuverkasamtakanna í Bandaríkjunum í september 2001. Eftir innrás Bandaríkjanna í Afganistan er talið að hann hafi flúið til Pakistan með föður sínum.

Ayman al-Zawahiri, leiðtogi al-Qaeda kynnti Hamza á hljóðupptöku árið 2015 og síðan þá hefur hann kallað eftir hryðjuverkaárásum í höfuðborgum vestrænna ríkja og heitið hefndum vegna föður síns, sem var skotinn til bana af Bandarískum sérsveitarmönnum í Pakistan árið 2011.

Samkvæmt Reuters er talið að Hamza hafi þá verið í stofufangelsi í Íran. Skjöl sem fundust á heimili Osama eru sögð sýna fram á að bandamenn hans hafi verið að reyna að fá Hamza úr haldi.



Hamza mun einnig ógna konungsfjölskyldu Sádi-Arabíu en hann hefur kallað eftir því að ættbálkar ríkisins sameinist með al-Qaeda í Jemen og berjist gegn Sádi-Arabíu.