Mannskæðir skýstrokkar gengu yfir í Alabama

Að minnsta kosti tuttugu og þrír eru látnir í Alabamaríki í Bandaríkjunum eftir að skýstrokkar gengu yfir austurhluta ríkisins. Óttast er að tala látinna eigi eftir að hækka en björgunaraðgerðum var hætt í nótt sökum myrkurs. Börn eru á meðal látinna.

Óljóst er hversu margir eru sárir en yfirvöld hafa lokað svæðinu sem verst varð úti, í Lee sýslu. Skýstrokkarnir voru óvenjuöflugir og náði vindhraðinn allt að 266 kílómetra hraða á klukkustund í verstu hviðunum. Þeir skildu eftir sig slóð eyðileggingar sem var að minnsta kosti áttahundruð metra breið.

Um fjögur þúsund manns eru án rafmagns í ríkinu og af þeim eru um tvö þúsund í Lee sýslu. Spáð er kuldakasti á svæðinu og er búist við að hitastigið nálgist frostmark í sýslunni í dag.

Svo virðist sem fleiri hafi látið lífið vegna skýstrokka nú í Lee sýslu, en dóu allt árið af þeirra völdum í fyrra. Donald Trump Bandaríkjaforseti minntist hinna látnu á Twitter-reikningi sínum í gær.

To the great people of Alabama and surrounding areas: Please be careful and safe. Tornadoes and storms were truly violent and more could be coming. To the families and friends of the victims, and to the injured, God bless you all!

— Donald J. Trump (@realDonaldTrump) March 4, 2019