Arsenal að ganga frá kaupum á Suarez frá Barcelona

Denis Suarez verður að öllum líkindum orðinn leikmaður Arsenal áður en morgundagurinn er allur ef marka má fréttir frá Englandi.

Talið er að Arsenal sé við það ganga frá kaupunum á þessum 24 ára gamla spænska miðjumanni sem er á mála hjá Barcelona en hann þekkir vel til Unai Emery, stjóra Arsenal, þar sem þeir unnu saman hjá Sevilla 2014-2015 þar sem Suarez var lánsmaður frá Barcelona.

Suarez er ekki ókunnugur enska boltanum því hann var á mála hjá Manchester City frá 2011 til 2013 án þess þó að ná að brjóta sér leið í aðallið Man City.

Hann hefur einnig leikið fyrir Villarreal á ferlinum en hann hefur aðeins komið við sögu í sex leikjum með Barcelona í vetur.