Veitti konu stunguáverka í heimahúsi í Þorlákshöfn

Héraðsdómur Suðurlands úrskurðaði í morgun karlmann í gæsluvarðhald vegna stunguárásar í heimahúsi í Þorlákshöfn síðastliðinn sunnudag.

Í tilkynningu á vef lögreglunnar segir að maðurinn sé talinn hafa veitt konu á fimmtugsaldri stunguáverka á kvið með hnífi.

„Konan var flutt af vettvangi á sjúkrahús, með sjúkrabifreið, þar sem hún dvelur enn en er ekki talin í lífshættu. Báðir aðilar eru af erlendu bergi brotnir en hafa verið búsettir hér og unnið um lengri tíma,“ segir í tilkynningunni.

Maðurinn var úrskurðaður í gæsluvarðhald til fimmtudagsins 8. nóvember klukkan 18.