Spíser dú dansk?

Maður skyldi ætla að Píratar væru búnir að leggja nafn Piu Kjærs­gaard á minnið. Nóg kom hún í bakið á þeim í sumar á Alþingishátíðinni þegar í ljós kom að þeir gleymdu að gúgla hana og vissu því ekkert um stjórnmálaskoðanir hennar. En eftir að kommentakerfið hafði logað í rúmlega 37 mínútur ákváðu þeir að sniðganga hátíðarfund á Þingvöllum, svo mikið var þeim niðri fyrir.

Víkur nú sögunni til kóngsins Kaupmannahafnar. Þar var á dögunum systurhátíð Þingvallafundarins. Fínasta fólk Danmerkur og Íslands sat undir ræðum á milli þess sem skálað var og allir auðvitað á dagpeningum eins og lög gera ráð fyrir.

Einn þingmanna Pírata var fulltrúi Íslands á þessari herlegu samkomu. Nú myndu einhverjir halda, í ljósi harðrar afstöðu Pírata gegn ræðuhöldum Piu á Íslandi, að Píratinn myndi neita að taka þátt í athöfninni í Kaupmannahöfn. Reyndar væri jafnvel ríkari ástæða til mótmæla, því í Danmörku búa fórnarlömb málflutnings Piu. Að minnsta kosti væri nauðsynlegt fyrir Píratann okkar að gæta lágmarks samræmis í afstöðu sinni.

Líklegast er að Píratarnir hafi ekki lesið dagskrána, ekki frekar en síðast. En nú var ekkert svigrúm til fundahalda, Píratinn okkar sest í sætið sitt með fangið fullt af snittum og allt í einu birtist Pía á sviðinu, eins og skrattinn úr sauðarleggnum. Góð ráð dýr. En svo blessunarlega vildi til að Pia talaði á dönsku. Þrátt fyrir danskt eftirnafn Píratans okkar þá sagði hún aðspurð að í raun hefði þetta allt verið í lagi, því hún skildi ekki dönsku.

Og þar með samviskan hrein.