Segir Svandísi styrkja stöðu sígarettunnar

Ólafur Stephensen, framkvæmdastjóri hjá Félagi atvinnurekenda, telur einsýnt að ný reglugerð muni kæfa rafrettubransann með ófyrirsjáanlegum afleiðingum. Hann telur um afar vanhugsaða reglugerð að ræða, svo ekki sé meira sagt.

Krefjast þess að reglugerðin verði felld úr gildi

Ný reglugerð sem Svandís Svavarsdóttir heilbrigðisráðherra setti í byrjun mánaðarins hefur nú þegar tekið gildi. FA gerir alvarlegar athugasemdir við í bréfi sem þeir hafa sent heilbrigðisráðherra. Þar er sett fram sú krafa að reglugerðin verði þegar í stað felld úr gildi.

Reglugerðin fjallar um tilkynningar til Neytendastofu um markaðssetningu rafrettna og áfyllinga fyrir rafrettur sem innihalda nikótín. Samkvæmt reglugerðinni verða framleiðendur og innflytjendur rafrettna og áfyllinga fyrir þær að tilkynna allar vörur til Neytendastofu sex mánuðum áður en vörurnar eru settar á markað. Neytendastofa tekur síðan afstöðu til þess hvort varan uppfyllir öryggisstaðla.

Gjaldið sem Neytendastofu er ætlað að taka fyrir hverja tilkynningu er 75.000 krónur.

Þetta kemur fram á vef FA. Vísir ræddi við Ólaf sem er furðulostinn vegna þessara aðgerða Svandísar.

Vilja kæfa bransann í fæðingu

 „Ekkert samráð var haft við innflytjendur eða seljendur rafrettna við samningu þessarar reglugerðar. Enda tekur hún ekkert mið af raunveruleikanum á þessum markaði. Það verður ekki annað sé en ætlunin sé að kæfa þennan bransa í fæðingu. Og þar með er þá heilbrigðisráðherra, meðvitað eða ómeðvitað, að styrkja stöðu sígarettunnar,“ segir Ólafur.

Sé litið til sölutalna útgefinna frá ÁTVR, eða talanbrunns Landlæknisembættisins má ætla að tóbaksreykingar hafi dregist verulega saman. Þær eru hvergi minni en á Íslandi. Daglegu reykingarfólki fækkaði úr 35 þúsund (14% landsmanna) í 22 þúsund (9% landsmanna) frá 2014 til 2017. 

Guðmundur Karl Snæbjörnsson læknir greinir augljósa fylgni milli þess að gufuvélarnar eða E-sigarettur komu til sögunnar og svo þessarar staðreyndar.

Fólk í ráðuneytinu veit ekkert hvað gerir

„Reykingarnar eru hríðfallandi eins og við höfum aldrei áður séð séð. Stærstu orsakavaldarnir eru munntóbakið og veipurnar sem eru klárlega að hreinsa reykingarnar í burtu,“ sagði Guðmundur Karl í samtali við Vísi fyrr á árinu. Hann hefur látið þessi mál mjög til sín taka og telur gufuvélina, eða veipu eins og hann kallar tækið, mikla blessun og leika lykilhlutverk í baráttunni gegn reykingum.

Yfirlýst markmið stjórnvalda er að draga úr reykingum og því er spurt hvað í ósköpunum þeim gangi til með þessari reglugerð? Ólafur Stephensen segir erfitt um að segja:

„Mögulega er tilgangurinn beinlínis að drepa þessa atvinnugrein. En, það gæti líka verið að í velferðarráðuneytinu starfi bara ekki fólk sem veit hvernig viðskiptalífið gengur fyrir sig og hefur því ekki skilning á afleiðingum gjörða sinna.“