Fjórir í forystu fyrir lokahringinn

Fyrir lokahringin á Opna kanadíska mótinu á PGA mótaröðinni í golfi eru fjórir kylfingar jafnir í fyrsta sæti, þeirra á meðal er efsti maður heimslistans, Dustin Johnson.

Hinn 34 ára Johnson fékk fimm fugla á fyrstu sex holunum á þriðja hringnum og lauk leik á sjö höggum undir pari. Hann er því samtals á 17 höggum undir pari.

Með honum í forystu eru Suður-Kóreumennirnir Byeong Hun An og Whee Kim og Bandaríkjamaðurinn Kevin Tway. Þeir hafa fjögurra högga forystu á Hudson Swafford og Rory Sabbatini í 5. sætinu.

Margir af fremstu kylfingum heims eru fjarverandi á mótinu en toppbaráttan verður mjög spennandi á lokahringnum í dag.

Bein útsending frá lokahring mótsins hefst á Golfstöðinni klukkan 17:00.