Gylfi og Alexandra trúlofuð

Knattspyrnumaðurinn Gylfi Sigurðsson og kærasta hans, Alexandra Helga Ívarsdóttir, eru trúlofuð. Gylfi og Alexandra greindu bæði frá þessu á Instagram-reikningum sínum í dag.

Gylfi tilkynnti um trúlofunina með mynd af parinu, þar sem þau kyssast innilega á bryggju með kerti og rósablöð í forgrunni. Við myndina skrifar Gylfi: „Hún sagði já!“.

Alexandra deildi sömu mynd af sér og nýbökuðum unnustanum á nánast sama tíma og Gylfi. „Eftir fulkominn dag á Bahamaeyjum játaðist ég besta vini mínum. Get ekki beðið eftir að giftast þér, elskan!“ skrifar Alexandra. Þá birtir hún með þessu myllumerkið #07072018, sem gæti gefið til kynna að Gylfi hafi skellt sér á skeljarnar á laugardaginn, þann 7. júlí síðastliðinn.

 

She said YES

A post shared by Gylfi Sigurdsson (@gylfisig23) on Jul 9, 2018 at 8:10am PDT

Parið hefur dvalið á Bahamaeyjum undanfarna daga. Ljóst er að þau hafa haft ýmislegt annað fyrir stafni í fríinu en að synda með svínunum á hinni vinsælu Grísaströnd, líkt og Vísir greindi frá í dag.



Þá hafa Gylfi og Alexandra verið saman um nokkurt skeið en þau opinberuðu samband sitt árið 2011.