„Það er náttúrulega grimmilegt að drepa einhvern sem vill ekki deyja“

Á sunnudaginn ætla Vegan samtökin hér á landi að koma saman fyrir framan Alþingi og mótmæla hvalveiðum. Í fréttatilkynningu frá samtökunum segir að þar verði mótmælt þessum „grimmu og ónauðsynlegu drápum“ á hvölum í íslenskri lögsögu.

„Við erum að fara að mótmæla hvalveiðum og ástæðan fyrir því er að það eru hrottalegar aðferðir sem eru notaðar við veiðarnar á þessum hvölum. Það eru margar ástæður sem er hægt að nota til þess að hætta,“ segir Birkir Steinn Erlingsson formaður Vegan samtakanna í samtali við Vísi.

„Þessi tegund af hvölum er í útrýmingarhættu víðs vegar í heiminum. Hvalir eru náttúrulega bara tilfinningaverur eins og við. Mér finnst það vera aðalástæðan fyrir því að við ættum ekki að vera að veiða þá því að það er náttúrulega grimmilegt að drepa einhvern sem vill ekki deyja.“

Vonar að forsætisráðherra taki málið fyrir 

Birkir bendir á að í samfélaginu hafi fólk aðra valkosti og hvalveiðar séu því ekki nauðsynlegar. 

„Við höfum ekkert að gera við þetta. Við höfum aðra valkosti til að borða og þetta er ekki að skapa það mikið af vinnu að samfélagið fari á hausinn við að hætta þessu. Meiriparturinn af heiminum er á móti þessu og það er verið að skrifa greinar um þetta úti um allt, hvað það sé skrítið að við séum að byrja á þessu aftur. Með mótmælunum viljum við standa saman gegn þessu óréttlæti gegn þessum hvölum sem eru dýr eins og við.“

Hann er bjartsýnn á að mótmælin fái athygli og nái til einhvers sem getur haft áhrif á þessi mál.

„Við erum að halda þessu máli vakandi og vonumst til þess að Katrín Jakobsdóttir taki þetta fyrir því það er á stefnuskrá Vinstri grænna að hætta hvalveiðum.“

Erfitt að fylgjast með skipunum

Mótmælin verða á Austurvelli frá klukkan 11 til 13 en nú þegar hafa margir sýnt viðburðinum áhuga á Facebook. https://www.facebook.com/events/386302151878893/

„Verið er að drepa Hrefnur og Langreyðar núna í kringum Ísland. Við biðjum ykkur um að vera með okkur og krefjast fullrar verndar á þessum mögnuðu dýrum sem færa hundruði þúsunda manna gleði og hrifningu á hverju ári. Við þurfum að fagna hvölum en ekki að drepa þá. Endilega takið þátt og hjálpið okkur að búa til framtíð þar sem hvalir geta synt við Íslands strendur í friði,“ segir í tilkynningu um mótmælin.

Birkir segir að erfitt sé að skipuleggja mótmæli í Hvalfirði þar sem skipin koma með hvalina.

„Þeir slökktu á staðsetningarbúnaðinum sem hægt er að fylgjast með á netinu svo það er ekkert hægt að fylgjast með þeim. Við vitum það bara með klukkutíma fyrirvara, kannski, ef við erum að fylgjast með í firðinum.“