Fugl á lokaholunni og Ólafía í góðum málum

Ólafía Þórunn Kristinsdóttir spilaði stöðugan fyrsta hring á Wallmart mótinu í Arkansas og er á tveimur höggum undir pari eftir 18 holur. Mótið er hluti af LPGA mótaröðinni.

Ólafía byrjaði á tíunda teig og fékk fugl strax á sinni annari holu en svo kom skolli tveimur holum seinna. Ólafía fékk annan fugl á 18. holu, þeirri níundu sem hún spilaði, og var á einu höggi undir pari eftir fyrri níu holurnar.

Hennar seinni níu holur fór hún allar á parinu nema þá síðustu þar sem hún nældi í fugl og endaði því á tveimur höggum undir pari.

Þegar Ólafía lauk leik var hún jöfn í 30. sæti.

Mótið er aðeins 54 holur en ekki 72 eins og vaninn er og skorið verður niður eftir annan keppnisdag á morgun. Þar sem oftast er miðað við niðurskurð við 70 kylfinga er Ólafía í ágætum séns á að komast þar í gegn.

Bein útsending frá mótinu hefst á Golfstöðinni klukkan 22:30.