Nýstofnað umhverfis-og heilbrigðisráð: Ætla að gera grænu málunum í Reykjavík hátt undir höfði

Líf Magneudóttir, oddviti Vinstri hreyfingarinnar – græns framboðs í Reykjavík, segir að grænu málin verði í öndvegi í borginni á komandi kjörtímabili. Áhersla á umhverfismálin sé lykilatriði í uppbyggingu Reykjavíkurborgar til framtíðar. Á blaðamannafundi sem lauk fyrir skömmu tilkynnti Líf að meirihlutinn hefði stofnað nýtt ráð sem heldur utan um umhverfis-og heilbrigðismál.

Spurð að því hvað felist í nýju umhverfis-og heilbrigðisráði svarar Líf: „Við höfum myndað nýtt ráð þar sem við gerum umhverfismálunum og grænu málunum í Reykjavík hátt undir höfði. Þar er auðvitað allt undir, eins og heilbrigðiseftirlitið. Í því felst vatnsvernd, loftgæði, loftslagsmál, umhverfismál, orkuskipti í samgöngum, grænar ofanvatnslausnir og líffræðileg fjölbreytni. Þetta er mikið, stórt og víðfeðmt.“

Líf vill að Reykjavík verði vistvæn borg og hyggst þróa hana áfram með áherslu á vistvænt og sjálfbært umhverfi. „Grænu málin mega ekki vera undanskilin þegar við erum að byggja Reykjavík til framtíðar.“

Aðspurð hvort nýr meirihluti hyggist taka svifryksmálin föstum tökum, segir Líf að svo verði. Málaflokkurinn heyri að mestu undir nýtt umhverfis-og heilbrigðisráð en hann sé þó „þvert á allt saman því við þurfum að gera áætlanir um hvernig við ætlum að minnka svifryk og auka loftgæði.“ Í því felst meðal annars að leggja áherslu á vistvæna ferðamáta og að breyta ferðavenjum borgarbúa.

Vinstri hreyfingin – grænt framboð á í ríkisstjórnarsamstarfi með Framsóknarflokki og Sjálfstæðisflokki. Aðspurð hvort hún sjái fram á góða samvinnu á milli borgarstjórnar og ríkisstjórnar segist Líf hafa fulla trú á því. „Borgarlínan er ein af þessum stóru málum en það eru líka orkuskipti í samgöngum sem eru mikilvæg og þar getur borgin komið inn með mjög afgerandi hætti til þess að auðvelda borgarbúum að fara yfir í vistvæna ferðamáta, meðal annars að kaupa vistvæna bíla.“

Þú hefur ekkert viljað verða borgarstjóri í Reykjavík?

„Ég verð það bara næst,“ segir Líf glöð í bragði og bætir við „Það er gott að geta sinnt mörgum hlutverkum og fengið reynslu. Ég verð það bara næst.“

Hvað með minnihlutann? Ætlið þið að ástunda samræðustjórnmál?

„Við erum fjölskipað stjórnvald og þar skiptir aðkoma allra flokka máli. Við höfum opnað á samstarf við hina flokkana um að þeir fái að leiða eitthvað og stýra einhverju, þannig að allir fái að gera það sem þeir eru góðir í. Enginn getur gert allt en við getum öll gert eitthvað og ég held við getum orðið breið og sterk ríkisstjórn þar sem við erum í góðri samvinnu þvert á flokka, það er allavega það sem ég vil,“ segir Líf Magneudóttir sem mun gegna formennsku í nýstofnuðu umhverfis-og heilbrigðisráði auk þess sem hún verður varaformaður borgarráðs.

Hér að neðan er hægt að hlusta á viðtal sem fréttamaður okkar, Jóhann K. Jóhannsson, tók við Líf Magneudóttur að loknum blaðamannafundi.