Málefnasamningurinn svar við gagnrýni að mati prófessors í stjórnmálafræði

Málefnasamningur áframhaldandi meirihluta á Akureyri er ákveðið svar við gagnrýni sem var uppi í aðdraganda sveitarstjórnarkosninga þess efnis að bæjarstjórnin þyrfti að herða róðurinn í leikskólamálum bæjarins. Þetta er mat Grétars Þórs Eyþórssonar, prófessors í stjórnmálafræði við Háskólann á Akureyri.

Hann segir að sáttmálinn endurspegli þessa háværu kröfu um betrumbætur í leikskólamálum. „Það virðist vera mjög framarlega hjá þessum meirihluta að ganga í það,“ segir Grétar Þór en flokkarnir þrír sem starfa saman í meirihluta á Akureyri lögðu allir ríka áherslu á yngri barna kennslu.

Blaðamaður Vísis fékk Grétar Þór til þess að rýna með sér í afrakstur meirihlutaviðræðna.

Í gær undirrituðu oddvitar Framsóknarflokks, L-lista og Samfylkingar málefnasamning meirihlutans fyrir næstu fjögur ár. Guðmundur Baldvin Guðmundsson, oddviti Framsóknarflokks, verður, líkt og áður, formaður bæjarráðs, Halla Björk Reynisdóttir, oddviti L-listans, tekur við embætti forseta bæjarstjórnar og Hilda Jana Gísladóttir, oddviti Samfylkingarinnar, verður formaður velferðarráðs og stjórnar Akureyrarstofu.

Sjá nánar: Áhersla á leikskólamál í málefnasamningi meirihlutans á Akureyri

Grétar Þór segir þó að það séu ekki neinar sérstakar vendingar frá fyrra kjörtímabili en segir þó að það vaki athygli að Framsóknarflokkurinn haldi formanni bæjarráðs. „Það er talið að Samfylkingin hefði gefið aðeins eftir og reyndar sagði Hilda Jana það í útvarpinu í morgun. Þau hafi gefið meira eftir en hinir hvað varðar nefndir.“

Helstu áherslur meirihlutans voru sem fyrr segir dagvistunarmál en Grétar Þór vekur athygli á því að í sáttmálanum sé lögð töluverð áhersla á að ná árangri í stórum hagsmunamálum svæðisins gagnvart ríkisvaldinu. Meirihlutinn vilji beita sér fyrir raforkuflutningum, flugvallarmál og eflingu millilandaflugsins.

En er minnihlutinn í bæjarstjórninni ekki frekar ósamstíga? Sóley Björk Stefánsdóttir hjá Vinstri grænum á til dæmis meiri samleið með meirihluta en minnihluta, eða hvað?

„Jú, svona fyrir fram myndi maður nú búast við því að það sé kannski ekki mjög mikill samhljómur á milli Sóleyjar í VG og svo Sjálfstæðisflokksins og Miðflokksins, sem er óskrifað blað hérna. Auðvitað er það þannig að það er líklegra en hitt að VG sé nú kannski í ýmsum málum meira sammála meirihlutanum en minnihlutanum.“

Meirihlutinn hefur lagt mikla áherslu á að ástunda samræðustjórnmál og að reyna að sætta sjónarmið allra innan bæjarstjórnarinnar og hefur boðað áframhald á þeirri stefnu. Grétar Þór segir því að ólíklegt megi teljast að það verði mikið um átök

„Það blasa ekki við mörg stór átakamál hérna framundan á Akureyri, maður sér það ekki fyrir sér, þó að Sjálfstæðisflokkurinn sé búinn að boða harða stjórnarandstöðu en þá verðum við nú bara að sjá hvernig það verður. 

Það eru bara svo mörg mál sem líklegt er að flestallir flokkar séu meira og minna sammála, en það verður bara að koma á daginn hvernig það birtist.“ 

Sjá nánar: Gerir ráð fyrir aukinni hörku á næsta kjörtímabili