Vefja náttsloppunum fastar utan um sig þegar við mætum með skóflurnar

Árneshreppur á Ströndum er búinn að stela sviðsljósinu fyrir þessar kosningar. Bóndinn í Steinstúni vandar lögheimilisflytjendum ekki kveðjurnar. 

Fjórtánda lögheimilisskráningin í Árneshreppi var felld úr gildi í dag og hefur þar með aðeins ein fengist samþykkt en þrjár bíða enn úrlausnar Þjóðskrár. Hatrammar deilur vekja spurningar um hvort gróið geti um heilt í þessari litlu sveit, sem fjallað var um í fréttum Stöðvar 2 í kvöld. 

Það er talað um að það ríki deyfð yfir kosningabaráttunni fyrir þessar sveitarstjórnarkosningar. Það verður þó ekki sagt um Árneshrepp á Ströndum, sem er svo sannarlega búinn að stela sviðsljósinu.

Upphafið eru deilur um Hvalárvirkjun. Guðlaugur Ágústsson, bóndi í Steinstúni og hreppsnefndarmaður meirihlutans, var spurður um hvort sveitin væri í sárum og hvort gróið gæti um heilt: 

„Mér finnst þessi leiðindi og illindi vera mest rekin af fólki sem ekki býr hérna. Ég verð að segja það alveg eins og er. Fólkið sem setti rassgatið í sveitarfélagið á unglingsaldri, það er mest það, það er langháværasti hlutinn,“ segir Guðlaugur. 

Oddvitinn er sakaður um óeðlileg samskipti við virkjunaraðila. 

„Það hafa komið fram upplýsingar, bara núna síðast í blöðum, þar sem er lýst samskiptum oddvita og Vesturverks. Og ég held að þau tali fyrir sig sjálf. Ég þarf svo sem ekki að hafa neina sérstaka skoðun á því,“ segir Ólafur Valsson, dýralæknir og kaupmaður í Norðurfirði.

„Það er búin að fara fram alveg gríðarleg lúsaleit, - bara aumkunarverð lúsaleit, finnst mér,“ segir Guðlaugur. 

„Það er eitthvað fólk búið að ólmast á oddvita hér í allan vetur um að fá öll samskipti við alla sent til sín í tölvupósti. Ég er ekki að segja, - það er sjálfsagt ekkert neitt að fela, - en ég meina: Þetta er bara ótrúlegt. Oddviti hefur nánast ekkert getað gert neitt annað í vetur.“ 

„Gróa um heilt? Ég trúi nú ekki öðru. Ég hef ekki trú á öðru, auðvitað grær um heilt. Fólk hér verður að hjálpast að,“ segir Ólafur. 

„Við hérna í sveitinni, ef við þurfum að gera eitthvað saman þá mætum við bara saman og gerum það. Þetta fólk sem er að flytja lögheimilið sitt svona á þennan hátt norður, þetta fólk er ekki að fara að taka þátt í því sem við erum að gera, að reka samfélagið hér,“ segir Guðlaugur.

„Ef það bilar vatnsveita hér, þá mætum við bara með skóflurnar okkar. Og ég veit að þetta er bara eitthvað fólk sem vefur náttsloppunum bara aðeins fastar utan um sig í staðinn fyrir að koma með skóflurnar sínar. 

Ef það bilar vatnsveita hérna í kaupfélaginu, eða í höfninni, þá mætum við hreppsnefndarmenn og fleiri til þess að gera við það. Ef það fýkur þak, þá mætum við allir til þess að laga það. Þetta er ekki fólk sem er að fara að hjálpa okkur við þessa hluti,“ segir Guðlaugur.

Hér má sjá frétt Stöðvar 2: