Lögregla leitar vitna að banaslysinu á Suðurlandsvegi

Lögreglan á Suðurlandi biður þá sem telja sig hafa orðið vitni að banaslysinu á Suðurlandsvegi á miðvikudag að hafa samband við lögreglu, að því er fram kemur í tilkynningu.

Hægt er að hafa samband við lögregluna á Suðurlandi í gegnum Facebook-síðu hennar, í tölvupósti á sudurland@logregla.is eða í síma 444-2000.

Sjá einnig: Tildrög banaslyssins á Suðurlandi enn óljós

Þá kemur fram í tilkynningu að áfram sé unnið að rannsókn slyssins sem varð með þeim hætti að jeppi og fólksbifreið rákust saman á Suðurlandsvegi við afleggjaran að Landeyjarhafnarvegi. Kona á miðjum aldri, sem var ein í öðrum bílnum, lést í slysinu. Í hinum bílnum voru þrír erlendir ferðamenn, allt karlar, sem fluttir voru á sjúkrahús.