Koma umdeildustu konu Bandaríkjanna til varnar

Grínistinn Michelle Wolf hefur heldur betur verið á milli tannanna á fólki í Bandaríkjunum eftir að hún kom fram á árlegum kvöldverði blaðamanna innan Hvíta hússins á laugardag.

Ýmsir telja að þar hafi hún gengið of langt. Ummæli hennar um Söruh Huckabee Sanders, fjölmiðlafulltrúa Hvíta hússins, þóttu of persónuleg og þá var hún óhrædd við að nefna mál Stormy Daniels, klámstjörnunnar sem vill segja söguna af kynnum sínum við forsetann.

Sjá einnig:Eina kvöldið sem má gera grín að forsetanum

Aðeins sólarhring eftir uppistand Wolf gáfu samtök blaðamanna innan Hvíta hússins út yfirlýsingu þar sem sagt var að uppistand hennar hafi ekki verið í anda þessa sem samtökin standa fyrir.

Háðfuglarnir og stjórnendur helstu spjallþátta Bandaríkjanna tóku málið fyrir í þáttum gærkvöldsins og komu þeir flestir Wolf til varnar, líkt og sjá má í myndböndunum hér fyrir neðan.