Ökumenn fastir á Fjarðarheiði

Björgunarsveitir á Austurlandi voru rétt fyrir klukkan sex kallaðar út vegna bíla sem voru fastir á Fjarðarheiði og Fagradal.

Veður var með ágætum á Austurlandi þangað til skyndilega skall á mikið hvassviðri seinni part dags. Að sögn viðstaddra björgunarsveitarmanna sést lítið sem ekkert fram fyrir húddið á bílnum. Skyggnið sé afleitt.

Björgunarsveitir frá Egilsstöðum Seyðisfirði, Jökuldal og Reyðarfirði eru nú að störfum og aðstoða ökumenn sem komast ekki leiðar sinnar. Tekist hefur að snúa einhverjum bílanna við.