Rík skylda eigenda og forráðamanna að brunavarnir húsa séu í takt við starfsemi hverju sinni

Enn er allt á huldu um hvers vegna eldur kom upp í verslunar- og iðnaðarhúsinu að Miðhrauni fjögur fyrir helgi. Slökkviliðsstjóri segir hafa komið á óvart hversu hratt byggingin brann. Rík skylda er á eigendum húsa um að eldvarnir þeirra séu í samræmi við starfsemi á hverjum tíma.

Vettvangsrannsókn á eldsupptökum hófst í dag en lögreglan fékk vettvanginn afhentan á föstudagskvöld en af öryggissjónarmiðum var beðið með vettvangsrannsókn til dagsins í dag.

Tæknideild lögreglunnar á höfuðborgarsvæðinu vinnur að rannsókn brunans með aðstoð Slökkviliðs höfuðborgarsvæðisins en glæður hafa verið að finnast í ýmsum eldhreiðrum í byggingunni nú fjórum dögum eftir brunann.

Eins og sjá má hafa verið gríðarleg átök átt sér stað í eldhafinu sem varð á fimmtudag. Aðalburðarsúlur hússins hafa svignað og gefið sig en þess að aflögun sem þessi geti átt sér stað þarf gríðarlega hita.

Slökkviliðsstjóri höfuðborgarsvæðisins segir það hafa komið á óvar á hve skömmum tíma stærsti hluti hússins hvar verið orðinn alelda

„Hraðinn var það mikill að við náðum aldrei fram fyrir atburðarásina. Við vorum í rauninni alltaf að elta atburðarásina og náðum aldrei að stýra henni,“ segir Jón Viðar Matthíasson, slökkviliðsstjóri Slökkviliðs höfuðborgarsvæðisins.

Hvaða lærdóm dragið þið af þessum bruna?

„Það sem stendur upp úr og það sem maður er afskaplega þakklátur fyrir er að enginn hafi slasast. Við vorum ansi nærri því að menn væri að slasast hérna hjá okkur,“ segir Jón Viðar.

Eins og fram hefur komið í fjölmiðlum var ekkert vatnsúðakerfi í húsinu sem hæglega hefði hamlað útbreiðslu eldsins. Ábyrgð eigenda húsa og bygginga er mikið þegar kemur að eldvörnum og eldvarnareftirliti.

Í reglugerð sem Björt Ólafsdóttir, þáverandi umhverfisráðherra samþykkti á síðasta ári kemur fram að eigandi mannvirkis ber ábyrgð á að það fullnægi kröfum um brunavarnir sem fram eru settar í lög lögum og reglugerðum og að brunavarnir taki mið af þeirri starfsemi sem fer fram.

Þá segir einnig að eigandi ber ábyrgð á eigin brunavörnum og skal hann gæta þess að viðhalda brunatæknilegu öryggi í mannvirki í samræmi við forsendur byggingarleyfis eða eðli starfseminnar á hverjum tíma.

Þá kemur fram að eigandi geti ekki takmarkað ábyrgð sína samkvæmt reglugerð með samningum, til að mynda við leigutaka sem einnig hefur ríkar skyldur.

Sjáið þið að í þessu húsi hafi verið gerðar breytingar sem ekki hafi verið samþykktar?

„Við sjáum breytingar á notkun. Hér var Latibær einu sinni og svo breyttist það yfir í Icewear eða lagergeymslu fyrir Icewear. Hvort að það eitt og sér hafi kallað á breytingar erum við þessa stundina að fara yfir með byggingafulltrúa Garðabæjar,“ segir Jón Viðar.

Fjallað var um málið í kvöldfréttum Stöðvar 2. Fréttina má sjá hér að neðan.