Sofandi ökumaður ók upp á umferðareyju

Ökumaður sem var á ferð á Reykjanesbraut við Bónus dottaði undir stýri og vaknaði upp við að hann var að aka upp á umferðareyju en nokkuð var um umferðaróhöpp í umdæmi lögreglunnar á Suðurnesjum í vikunni. Engin meiriháttar slys urðu þó á fólki. Þetta kemur fram í tilkynningu frá lögreglunni á Suðurnesjum.

Í tilkynningu segir að ökumaður hafi reynt að koma bifreið sinni á rétta braut eftir að hann hrökk upp af blundinum en ók þá utan í umferðarskilti. Bifreiðin var fjarlægð af vettvangi með dráttarbifreið.

Þá varð nokkuð harður árekstur á Njarðarbraut þegar bifreið var ekið aftan á aðra. Ökumaður síðarnefndu bifreiðarinnar var fluttur með sjúkrabifreið á Heilbrigðisstofnun Suðurnesja.