Nordsjælland á enn möguleika á titlinum

Rúnar Alex Rúnarsson og félagar í danska úrvalsdeildarliðinu Nordsjælland eiga enn möguleika á að hampa titlinum eftir 3-1 sigur á Silkeborg í kvöld.

Rúnar Alex var að vanda milli stanganna í kvöld og hann þurfti að sækja boltann í eigið net á 12. mínútu eftir að Davit Skhirtladze skoraði úr vítaspyrnu.

Áður hafði Nordsjælland þó komist yfir í leiknum og staðan því 1-1 og var hún þannig enn þegar liðin gengu til búningsherbergja.

Thomas Norgaard lét reka sig af velli á 70. mínútu og heimamenn í Nordsjælland voru ekki lengi að nýta sér það, varamaðurinn Nicklas Jakobsen skoraði aðeins fimm mínútum seinna. Annar varamaður, Nikolai Baden, tryggði svo 3-1 sigur Nordsjælland.

Þegar þrjár umferðir eru eftir í deildinni er Nordsjælland í þriðja sæti með 46 stig, sjö stigum á eftir toppliði Midtjylland. Bæði Midtjylland og Bröndby, sem situr í öðru sæti, eiga þó eftir að klára sinn leik í 23. umferðinni, liðin mætast innbyrðis seinna í kvöld.

Eggert Gunnþór Jónsson og félagar í Sonderjyske lágu á heimavelli fyrir Álaborg. Jores Okore skoraði eina mark leiksins á 4. mínútu.

Sonderjyske er í 10. sætinu með 25 stig, átta stigum frá botnliðunum.