Nýr viti á útsýnispalli við Sæ­braut

Framkvæmdir við nýjan innsiglingavita og útsýnispall við Sæbraut hefjast í næsta mánuði. Vitinn kemur í stað núverandi vita á Sjómannaskóla Íslands við Háteigsveg.

Borgarráð samþykkti á fundi sínum í síðustu viku að fara í framkvæmdirnar sem um ræðir.

Komið verður fyrir grjótvörn og fyllingu fyrir innsiglingarvitann á móts við Höfða. Nýr viti verður með sama útliti og innsiglingarvitar við Austurhöfn og Eyjagarð.

Byggður verður útsýnispallur kringum vitann svo gestir og gangandi geti notið fjallasýninnar, að því er fram kemur á vef Reykjavíkurborgar.

Áætlað er að framkvæmdir hefjist í febrúar nk. og þeim verði að fullu lokið í júní 2018. Áætlaður kostnaður Reykjavíkurborgar er 75 milljónir króna.