Ekki liggur fyrir hvenær neysluvatn mun standast ítrustu gæðakröfur á ný: „Eftir sem áður veldur það ekki hættu“

Fullyrt hefur verið að neysluvatn á höfuðborgarsvæðinu sé nú drykkjarhæft og engin hætta á ferðum en tvöfalt hærri gildi gerla en leyfileg eru mældust í drykkjarvatni á föstudag. Ekki er lengur talin þörf á að sjóða vatn en tilmæli um slíkt höfðutalsverð áhrif á starfsemi Landspítalans fram eftir degi. 

Í gærkvöldi var tilkynnt að mælst hefði fjölgun jarðvegsgerla í kalda vatninu í Reykjavík en tvö sýni sem Heilbrigðiseftirlit Reykjavíkur tók á föstudag, og fékk niðurstöðu úr í gær, stóðust ekki viðmið í reglugerð og mældust gildi gerla tvöfalt hærri en leyfilegt er.

Heilbrigðiseftirlitið mælti því með því að neysluvatn í vissum hverfum borgarinnar væri soðið til að gæta ítrustu varúðar. Var þá bara átt við neytendur sem eru viðkvæmir, til dæmis fólk með lélegt ónæmiskerfi og aldraða.

Ástæðan fyrir frávikinu í gerlamagni er mikil hlákutíð undanfarið í kjölfar langs frostakafla en við slíkar aðstæður getur yfirborðsvatn komist í grunnvatn og flutt með sér gerla. „Við erum með áætlun fyrir hlákutíð og fylgjumst vel með holunum okkar þegar við eigum von á hlákum. Þá sáum við hækkað gerlamagn og við hættum að taka vatn úr þeim holum og gerðum Heilbrigðiseftirlitinu viðvart. Þau tóku við og fóru að taka sýni úr dreifikerfinu,“ segir Ólöf Snæhólm Baldursdóttir, framkvæmdastjóri Veitna, en þá kom í ljósfjölgun gerla væri einnig í dreifikerfinu.

„Þetta er einstakur atburður. Það var extra mikið vatnsveður ofan á frostna jörð og þetta er ástand sem skapaðist og er í raun ekkert hægt að gera við. Þegar svona aðstæður eru þá skoðum við aðstæður sérstaklega og rannsökum,“ segir Árný Sigurðardóttir, framkvæmdastjóri Heilbrigðiseftirlits Reykjavíkur.

Hún útskýrir að jarðvegsgerlar séheiti yfir flest allar bakteríur sem finnast í umhverfi okkar.„við getum líkt þessu við að ef maður tekur gulrót upp úr matjurðargarðinum sínum ogdustar af henni og borðar þá eru auðvitað á henni jarðvegsgerlar,“ segir Árný.

Ástandið hafði talsverð áhrif á starfsemi Landspítalans en þeim tilmælum var beint til starfsmanna þar í gær að sjóða allt neysluvatn til sjúklinga og starfsfólks. Þá var einnig pantað talsvert magn af vatni í flöskum sem dreift var til sjúklinga fram eftir degi.

Eftir fund fulltrúa Heilbrigðiseftirlits Reykjavíkur og sóttvarnalæknisí hádeginu í dag var niðurstaðan sú að ekki væri lengur tilefni til að sjóða vatn og að það sé ekki hætta á heilsufarslegum afleiðingum við neyslu þess.

„Það varð ákveðin mengun í vatninu þannig að það stóðst ekki ítrustu öryggiskröfur en mat samstarfsnefndarinnar er eftir sem áður það að það valdi ekki hættu fyrir almenning,“ segir Þórólfur Guðnason, sóttvarnalæknir.  

Heilbrigðiseftirlitið mun halda mælingum áfram og verður almenningur upplýstur um gang mála á næstunni. Ekki er þó vitað hvenær  vatnið muni standast ítrustu gæðakröfur á ný. „Nýjustu upplýsingar liggja hreinlega ekki fyrir. Nú ef eitthvað breytist til hins verra þarf að setjast aftur niður og koma með nýjar leiðbeiningar,“ segir Þórólfur.

Þá segir Þórólfur mikilvægt að halda því til haga að saurgerlar sem valda sjúkdómum hafi ekki greinst í dreifikerfinu.Máli sínu til stuðnings skálaði hann í kranavatn við ólétta fréttakonu.