Aldarafmæli Laugabúðar fagnað

Haldið var upp á 100 ára afmæli Laugabúðar á Eyrarbakka í gær því það var 4. desember 1917 sem Guðlaugur Pálsson kaupmaður hóf verslunarrekstur á Eyrarbakka.

Guðlaugur rak verslunina í 76 ár eða fram í desember 1993, þegar hann lést tæplega 98 ára að aldri.

Fyrsti viðskiptavinur Guðlaugs var sr. Gísli Skúlason á Stóra-Hrauni, sóknarprestur Eyrbekkinga og Stokkseyringa. Sr. Gísli keypti eina litla vasabók á 22 aura.

Í dag er rekin ferðamannaverslun yfir sumarið í Laugabúð. Þar ræður Magnús Karel Hannesson og bregður sér í kaupmannssloppinn. Í tilefni afmælisins opnaði Magnús Karel Laugabúð í gær og rakti sögu verslunarinnar í máli og myndum.