Fagna gjaldfrjálsum námsgögnum í Reykjavík

Borgarstjórn samþykkti skömmu eftir miðnætti að námsgögn yrði gjaldfrjáls í Reykjavík frá og með skólavetrinum 2018-2019. Foreldrafélög allra grunnskóla í Breiðholti og SAMFOK (Samtök foreldra grunnskólabarna í Reykjavík) fagna ákvörðun Reykjavíkurborgar í yfirlýsingu sem þau sendu á fjölmiðla í nótt.

Í upphafi skólaárs sendu foreldrafélög allra grunnskóla í Breiðholti áskorun til borgaryfirvalda þar sem tekið var undir áskorun Barnaheilla um að yfirvöld virði réttindi barna til gjaldfrjálsrar grunnskólamenntunar, líkt og Barnasáttmáli Sameinuðu þjóðanna kveður á um. Í kjölfarið hafa tæplega 50 sveitarfélög tekið ákvörðun um að afla börnum gjaldfrjálsra námsgagna og nú einnig Reykjavík.

Sjá einnig: Ætla að bjóða gjaldfrjáls námsgögn á næsta ári

Félögin fagna þessari ákvörðun af margvíslegum ástæðum, sem reifaðar eru í yfirlýsingunni. „Til dæmis hefur slíkt fyrirkomulag jákvæð áhrif á kolefnisspor sveitarfélaganna og íbúa þeirra enda verður þetta til þess að umferð minnkar. Jafnframt sparast dýrmætur tími forráðamanna barna, tækifæri skapast til að nýta skólagögn betur, jafnræði meðal skólabarna borgarinnar er tryggt sem og bættur aðbúnaður barna sem standa höllum fæti.“

Undir yfirlýsinguna skrifa foreldrafélög Breiðholtsskóla, Fellasjóla, Hólabrekkuskóla, Seljaskóla, Ölduselsskóla og SAMFOK.