Hætt kominn þegar fíkniefnapakkning sem hann var með innvortis fór að leka

Íslenskur karlmaður var fluttur með hraði á Landspítalann í aðgerð á dögunum þegar fíkniefnapakkning sem hann var með innvortis fór að leka. Umræddur karlmaður, sem er á þrítugsaldri, kom með flugi frá Manchester 31. október síðastliðinn. Tollverðir stöðvuðu hann í Flugstöð Leifs Eiríkssonar vegna gruns um fíkniefnasmygl. Lögreglan á Suðurnesjum handtók hann síðan og flutti á lögreglustöð. Maðurinn var hætt kominn þegar pakkning með fíkniefnum sem hann hafði komið fyrr innvortis fór að leka og hefur aðgerðin á Landspítalanum án efa bjargað lífi hans. 

Samkvæmt upplýsingum frá lögreglustjóranum á Suðurnesjum reyndist maðurinn vera með 41 pakkningu af fíkniefnum innvortis. Þær innihéldu 300 grömm af kókaíni og 60 grömm af extacy – efni. Lögreglan telur málið upplýst.