Yfir 80 milljónir söfnuðust í átakinu Á allra vörum

Ríflega 80 milljónir söfnuðust í átakinu Á allra vörum, bæði með frjálsum framlögum og sölu á Á allra vörum varasettum frá Benecos. Málefni ársins að þessu sinni var bygging nýs húsnæðis fyrir Kvennaathvarfið.

„Við erum í skýjunum með árangurinn.  Þetta þýðir að góður grundvöllur er nú fyrir byggingu húsnæðis þar sem konur og börn þeirra geta búið í allt að tvö ár meðan verið er að fóta sig aftur út í lífið“, segir Elísabet Sveinsdóttir eftir að Á allra vörum söfnunarþættinum lauk rétt í þessu.

Í fréttatilkynningu um átakið kemur fram að þær sem standa að Á allra vörum vilja koma á framfæri þökkum til allra þeirra sem tóku þátt í átakinu og undirbúningi þess undanfarna mánuði.

„Við hefðum ekki verið á allra vörum án stuðnings alls þess fólks sem hjálpaði til að ná þessum magnaða árangri,“ segir Gróa Ásgeirsdóttir.

Dr. Sigrún Stefánsdóttir, kennari og fyrrum fréttamaður, sagði frá sinni reynslu af heimilisofbeldi í einlægu viðtali í söfnunarþættinum á RÚV í kvöld. Sagði hún þar meðal annars:

„Ég var nógu sterk til þess að fara út úr því áður en var búið að brjóta mig alveg niður. Það gekk svo mikið á að ég hugsaði „hingað og ekki lengra“ þannig að ég fer,“ 

Örfá varasett eru enn fáanlega á sölustöðum átaksins auk þess sem söfnunarnúmerin 903- 1502, 903-1505 og 903-1508, verða opin í viku til viðbótar.

„Við erum óendanlega þakklátar fyrir stuðning þjóðarinnar allrar, Heilsu sem flytur inn Benecos varasettin og allra söluaðilanna sem selt hafa varasettin án þess að taka söluþóknun. Það eru ekki til nóg stór orð til að lýsa þakklæti okkar“ segir Guðný Pálsdóttir.